Presidenti i Kosovës, Hashim Thaçi, kreu i PDK-së Kadri Veseli dhe nëntë ish-ushtarë të UÇK-së janë zyrtarisht të akuzuar nga Prokuroria Speciale për krime lufte.
Mësohet se akuza është zyrtarizuar më 24 prill 2020.
Zyra e Prokurorit të Specializuar u paraqiti Dhomave të Specializuara të Kosovës një aktakuzë me dhjetë pika për shqyrtim prej Gjykatës, ku Presidenti Hashim Thaçi, kreu i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura gjatë kohës së Luftës së Kosovës.
Edhe sot ka vijuar një operacion tjetër nga EULEX-i në shtëpinë e Jakup Krasniqit, zëdhënës i UÇK-së dhe ish-kryetar i Kuvendit të Kosovës, ndërsa raportohet se operacione të tjera janë duke u kryer dhe mund të ketë edhe arrestime.
