Sot hapet sistemi elektronik (në orën 15:00) për të aplikuar të gjithë të interesuarit për tërheqjen e dhjetëpërqindëshit nga Fondi i Kursimeve Pensionale të Kosovës që njihet si Trusti . Pagesa e dhjetëpërqindëshit nga Trusti për kontribuuesit bëhet 5-7 ditë pas ditës së aplikimit.
Kryeministri i Kosovës, Avdullah Hoti, ka njoftuar se sot në orën 15:00 do të hapet sistemi për të aplikuar për Fondin e Kursimeve Trust.
“Të premten, në orën 15:00, pasdite, hapet sistemi për të aplikuar për këto kursime”, ka njoftuar Hoti.
Në anën tjetër, zëvendësguvernatori i Bankës Qendrore, Sokol Havolli, tha se aplikimi për fondin e kursimeve është i lehtë.
“Aplikimi do të jetë shumë i thjeshtë. Në momentin e aplikimit numri personal dhe xhirollogaria duhet të jenë të sakta”, tha Havolli.
Andaj të gjithë të interesuarit aplikimin për tërheqjen e parave nga Trusti mund ta bëjnë që nga dite e sotme.
