Deklaratë e MPJD-së lidhur me vazhdimin e sanksioneve për Federatën Ruse
Agresioni i Federatës Ruse jo vetëm që ka hasur në rezistencën e shtetit dhe popullit ukrainas, por edhe është dënuar nga i gjithë komuniteti i shteteve, shprehur edhe përmes Rezolutës së Asamblesë së Përgjithshme të Kombeve të Bashkuara. Në të njëjtën kohë, partnerët tanë, Shtetet e Bashkuara të Amerikës dhe Bashkimi Evropian, kanë vazhduar politikën e kundërshtimit të këtij invazioni përmes mbështetjes në armatim të Ukrainës, forcim të kapaciteteve ushtarake në Evropën Lindore, si dhe sanksioneve shtesë.
Këshilli i Bashkimit Evropian me datë 25, 28 shkurt, 1, 2 dhe 9 mars 2022 ka marrë vendim për masa të reja kufizuese dhe zgjerimin e listës me persona juridikë dhe fizikë. Në këto masa, është përfshirë dhe Bjellorusia, për të cilën masat kufizuese aplikohen për zhvillimet e brendshme dhe rolin aktiv në cenim të integritetit territorial të Ukrainës.
Për këtë arsye, Ministria e Punëve të Jashtme dhe e Diasporës ka propozuar për shqyrtim dhe miratim vendimin për zbatimin e të gjitha Sanksioneve ekonomike dhe financiare, të përcaktuara nga Bashkimi Evropian ndaj Rusisë dhe Bjellorusisë. Pothuajse të gjitha sanksionet deri më tani janë miratuar në koordinim intensiv dhe të plotë në mes të Shteteve të Bashkuara të Amerikës, Bashkimit Evropian, dhe partnerëve të tjerë, në përpjekje për ta kundërshtuar fuqimisht luftën pushtuese të Rusisë në Ukrainë.
Sanksionet e zgjeruara gjithashtu përfshijnë ngrirje të aseteve të bankave, institucioneve financiare dhe individëve, ndalimin e qasjes së tyre në tregjet financiare, ndalimi i transmetimit të mediave propaganduese, materiale të ndryshme që mund të përdoren për makinerinë e luftës, restriksione Bjellorusisë për ndalimin e mundësisë së importeve të mallrave teknologjike si kundërpërgjigje e mbështetjes së luftës së Rusisë në Ukrainë, dhe masa tjera restriktive që shënjestrojnë ndërmarrjet e rëndësishme ruse, elitat dhe akterët politikë të përfshirë në invazionin rus në Ukrainë. Individët gjithashtu do t’i nënshtrohen ndalimit të udhëtimit apo tranzitit në vende që i zbatojnë këto sanksione.
Duke pasur gjithnjë për qëllim promovimin dhe mbrojtjen e paqes, demokracisë dhe të drejtave të njeriut, marrja e një vendimi të tillë do të kontribuonte në vazhdimësinë e bashkëpunimit të ngushtë me Shtetet e Bashkuara të Amerikës, Bashkimin Evropian dhe partnerët e tjerë në mbrojtjen e vlerave të përbashkëta demokratike dhe në ruajtjen e plotë të zbatueshmërisë së ligjeve dhe konventave evropiane dhe ndërkombëtare në Republikën e Kosovës, duke pasur parasysh kushtetutshmërinë dhe bazën ligjore të Kosovës, (veçanërisht Ligjin Nr. 03/l-183) “për Zbatimin e Sanksioneve Ndërkombëtare”
Së shpejti do të bëhen publike po ashtu informatat përkatëse për zbatimin e sanksioneve të reja të BE-së.
Rikujtojmë se Qeveria e RKS me datën 17 shtator 2014 ka nxjerrë vendimin 09/196 me të cilin asokohe ka mbështetur sanksionet e BE-së dhe SHBA-ve ndaj entiteteve juridike dhe autoriteteve të Federatës Ruse. Ky vendim ishte mbështetur në nenin 92 paragrafi 4. dhe 93 paragrafi (4) të Kushtetutës së Republikës së Kosovës, duke u bazuar në nenin 3 të Ligjit Nr. 03/l-183, “Për Zbatimin e Sanksioneve Ndërkombëtare”, në nenin 4 të Rregullores Nr. 02/2011, “Për fushat e përgjegjësisë administrative të Zyrës së Kryeministrit dhe Ministrive”, e ndryshuar dhe plotësuar me Rregulloren Nr. 07/2011 dhe nenit 19 të Rregullores së Punës së Qeverisë së Republikës së Kosovës nr. 09/2011.
