Ushtruesja e detyrës së Presidentes së Kosovës, Vjosa Osmani, ka njoftuar se është shëruar nga koronavirusi, dhe se është rikthyer në zyrën e saj në Presidencë, për të vazhduar me angazhimet e saj.
Ajo ka qëndruar dy javë në vetizolim dhe aktivitetet i ka zhvilluar kryesisht online.
“Kam bërë thirrje gjithnjë, e tani pas ekperiences time dhe të familjes time me virusin, ju lutem sërish që të bëni kujdes të shtuar e të vazhdueshëm. Tashmë virusi është çdokund. Ne ishim me fat ta luftojmë virusin me sukses, por, fatkeqësisht, ky nuk është fati i të gjithëve”, ka shkruar në rrjetet sociale, Osmani.
