Zyrtarë të lartë të Administratës amerikane qëndruan për dy ditë në Kosovë, në një vizitë, qëllimi i së cilës ishte zbatimi i Marrëveshjes për normalizimin ekonomik Kosovë-Serbi, që u nënshkrua në Shtëpinë e Bardhë më 4 shtator. Marrëveshjen e nënshkruan presidenti i SHBA-së, Donald Tramp, kryeministri i Republikës së Kosovës, Avdullah Hoti dhe kryetari i Serbisë, Aleksandër Vuçiq.
Delegacioni gjatë kësaj vizite u përqendrua në fillimin e studimit të fizibilitetit për Liqenin e Ujmanit dhe krijimin e lidhjeve më të mira në tregun e energjisë në Ballkanin Perëndimor. Tema për fillimin e studimit të fizibiliteti të Liqenit të Ujmanit ka ngjallur reagime të shumta për dhe kundër. Sidomos kundër kësaj marrëveshjeje ishte LVV-ja, e cila e cilëson si një lloj tradhtie çfarëdo ujdie që arrihet për normalizim marrëdhëniesh mes dy shteteve, Kosovës e Serbisë.
