Australiani që e kreu sulmin e tmerrshëm në dy xhami të Zelandës së Re do të paraqesë ankesë ligjore rreth kushteve të burgut në gjykatën e lartë të këtij shteti.
Brenton Tarrant, i cili vitin e kaluar u dënua me burgim të përjetshëm për vrasjen e 51 personave dhe një akuzë për terrorizëm, do të paraqitet në një seancë gjyqësore në Auckland të enjten, shkruan The Guardian,
Ai ka kërkuar rishikim juridik, i cili ka të bëjë me shqyrtimin nëse vendimet janë marrë sipas ligjit. Tarrant nuk do të ankohet kundër dënimit dhe seanca nuk ka të bëjë me rezultatin e rastit kriminal apo akuzën për terrorizëm.
Sipas informatave që gjykata ia ka ofruar gazetës britanike, The Guardian, vrasësi dëshiron që të shqyrtohen vendimet e marra nga Departamenti Korrektues për kushtet në burg.
Sulmuesi po mbahet në një burg në Auckland, me kushte të rrepta të burgimit dhe pak linja komunikimi me botën e jashtme.
Në sulmin e 15 marsit 2019, ky person vrau 44 njerëz në xhaminë “Noor” gjatë lutjeve të së premtes para se të shkonte në xhaminë “Linwood”, ku vrau shtatë të tjerë. Ai u deklarua fajtor për 51 vrasje, 40 tentim-vrasje dhe për një akuzë për terrorizëm. U dënua me burgim të përjetshëm pa të drejtë të faljes së dënimit më vonë.
