Është theksuar shumë herë se në bisedimet që po zhvillohen me Serbinë qe një dekadë, patjetër se duhej hapur edhe tema e përdhunimeve. Vasfije Krasniqi-Goodman thotë se është e pakuptimtë se si delegacioni i Kosovës deri më tani nuk e ka hapur në dialogun e Brukselit temën e rasteve të përdhunimeve që serbët kanë kryer në Kosovë. Llogaritet se serbët kanë përdhunuar në Kosovë më se 20 mijë femra.
Krasniqi-Goodman është gruaja e parë që ka treguar publikisht se ka qenë viktimë e dhunës seksuale gjatë luftës së fundit në Kosovë.
“Është dashur mbi 20 vjet që tema e të pagjeturve të diskutohet, e kjo nënkupton se ne ndoshta duhet pritur edhe shumë vite që të hapet tema për përdhunimet”, thotë ajo.
Sipas saj, çështja e përdhunimeve duhet të përfshihet në marrëveshjen përfundimtare me Serbinë dhe kryerësit e krimeve e përdhunimeve të dalin para drejtësisë.
Qeveria e Kosovës është pyetur se a do të hapet në bisedime me Serbinë çështja e përdhunimeve që serbët i kanë kryer në Kosovë, por zyrtarët e qeverisë nuk ka dhënë ndonjë përgjigje për këtë çështje.
Numri i viktimave të dhunës seksuale gjatë luftës në Kosovë, sipas institucioneve dhe organizatave që merren me mbrojtjen e të drejtave të kësaj kategorie, thuhet të jetë 20 mijë viktima.Organizata ndërkombëtare për mbrojtjen e të drejtave të njeriut, Amnesty International pati thënë se për viktimat e dhunës seksuale gjatë luftës në Kosovë ende nuk është vënë drejtësi. Sipas kësaj organizate, të mbijetuarit “e dhunës së tmerrshme seksuale, tash e disa vite kanë qenë të tradhtuar nga bashkësia ndërkombëtare dhe qeveritë e ndryshme”.
Megjithatë, Feride Rushiti, drejtoreshë ekzekutive në Qendrën Kosovare për Rehabilitimin e të Mbijetuarve të Torturës (QKRMT), thotë se dhuna seksuale nuk është përmendur as edhe një herë të vetme në dialogun me Serbinë. Të mbijetuarit e dhunës seksuale ende kanë frikë të dalin lirshëm sepse mendoj se dhunuesit mund të ndodhen diku, pasi nuk janë dënuar.
