Myslimani i mirë, myslimani i pilafit, duhet të falet pesë herë në ditë dhe pikë! Zoti nuk mashtrohet si Enver Hoxha.
Ra diktatura, dolën hoxhët e parë. Në një xhami të ftohtë, gati rrënojë, hoxha i bërë tapë nga rakia e fortë e Skraparit, u fliste besimtarëve që i mblodhi në rrugë për allahun, për ditën e kiametit dhe për zjarrin e xhehenemit.
Ata që duan t’i shpëtojnë zjarrit të xhehenemit të falen pesë herë në ditë.Turma e dëgjonte e shushatur, por edhe e frikësuar nga Zoti i ri që ishte edhe më i frikshëm se Zoti i komunistëve që i torturoi pesëdhjetë vjet.
-Po pse pesë herë në ditë, o hoxhë? pyeti njëri nga turma.
– Do të na shkojë dita në xhami, kalamajtë duan bukë. Pse nuk dalim në rrugë e të bërtasim pesë herë Rroftë Zoti.
Hoxha i acaruar me mosdijen e turmës për fenë që donin ta përqafonin, ua ktheu:
-Atëherë s’ka pilaf. Myslimani i mirë, myslimani i pilafit, duhet të falet pesë herë në ditë dhe pikë! Zoti nuk mashtrohet si Enver Hoxha.
