Politikani i krahut të majtë me prejardhje kroate, Gabriel Boriç u bë presidenti më i ri i Kilit të dielën, duke fituar ndaj kandidatit të ekstremit të djathtë, Jose Antonio Cast në një zgjedhje që kulmoi me të majtën progresive.
Në qendër të Santiago-s, mbështetësit e tij brohoritën, përqafuan dhe valëvitën flamuj me fytyrën e Boriçit, si dhe flamuj ylber nga grupet LGBT që mbështetën politikat e tij shoqërore gjithëpërfshirëse dhe planet për të rishikuar modelin ekonomik të Kilit të orientuar drejt tregut.Gjatë fjalimit të tij të fitores, Boriç njoftoi se qeveria e tij do të zgjeronte të drejtat sociale të popullsisë, por se do ta bënte këtë në një mënyrë të përgjegjshme fiskale dhe me synimin për t’u kujdesur për shëndetin e ekonomisë së prodhuesit më të madh të bakrit në botë.
Ai tha gjithashtu se do të kundërshtonte projektet e minierave që “shkatërrojnë” mjedisin natyror, duke përfshirë projektin e diskutueshëm 2.5 miliardë dollarë Domingo, i cili përfshin nxjerrjen e hekurit, bakrit dhe arit. “Duke shkatërruar botën tonë, ne po shkatërrojmë veten tonë. Ne nuk duam më shumë ‘zona të sakrifikuara’, nuk duam projekte që shkatërrojnë vendin tonë, komunitetet tona dhe theksojmë se në këtë rast ajo është bërë simbolike: Jo Domingo!” ka thënë Boriç. Projekti duhet të nisë jo shumë larg rezervateve natyrore rreth 500 kilometra në veri të kryeqytetit Santiago.
