Rreth 70 kompani turke bëjnë biznes në Serbi dhe shkëmbimet tregtare pritet të arrijnë në 1 miliard dollarë në vit. Erdogan tha se ata duhet të synojnë 5 miliardë dollarë dhe nënshkruan marrëveshje me Vuçiqin për të zgjeruar një marrëveshje të tregtisë së lirë.
Presidenti turk Tajip Erdogan premtoi gaz, investime dhe mbështetje për Ballkanin, në një përpjekje të dukshme për të zgjeruar ndikimin në një rajon të frustruar nga ritmi i ngadaltë i pranimit në BE.
Ndikimi turk tashmë është i fortë te myslimanët në Bosnjë, Shqipëri dhe Kosovë. Serbia është aleati më i ngushtë i Rusisë në Ballkan.
“Së bashku me Serbinë dhe me të gjithë Ballkanin, ne duam të bëjmë hapa për të zgjidhur të gjitha problemet,” u tha Erdogan gazetarëve në Beograd, duke thënë se Ankaraja planifikon të ndërtojë një rrugë midis Serbisë dhe Bosnjës.
Erdogan dhe homologu i tij serb, Aleksandar Vuçiç, nënshkruan një deklaratë politike për të krijuar një organ bashkëpunimi që do të takohet çdo vit për të koordinuar projektet e përbashkëta.Erdogan ka besim në marrëdhëniet me Rusinë
Erdogan shprehu besimin se Rusia nuk do të kundërshtojë një plan turk për të transferuar gaz natyror nga projekti i saj TurkStream në Serbi.
“Ne nuk duam asnjë ndarje të Ballkanit ose që dikush mund t’i shohë ato vende si sferën e tyre të ndikimit. Ne i kundërshtojmë të gjithë ata që e duan këtë”, tha Erdogan në një forum biznesi.
Vizita dhe falënderimi i Erdoganit për Vuçiqin për mbështetjen e tij gjatë një grushti të dështuar në vitin 2016, nuk do të kalojnë pa u vënë re në Bashkimin Evropian, ku disa diplomatë janë të shqetësuar për thellimin e autoritarizmit midis disa liderëve ballkanikë në mungesë të përparimit të prekshëm drejt pranimit në BE.
Serbia ende kërkon të anëtarësohet në BE
Serbia duhet të balancojë ambicien e saj për t’u bashkuar me BE-në me një afinitet që ndjejnë shumë serbë për Rusinë ortodokse. Ajo gjithashtu ka shumë nevojë për investime për të rritur një ekonomi ende në tranzicion nga komunizmi dhe duke u rikuperuar nga rënia e Jugosllavisë.
“Marrëdhëniet (turke) me BE-në nuk janë aq të mira për momentin; Ballkani është më i afërti që ata (turqit) mund të arrijnë me Evropën”, tha Mahmud Busatlija, një konsulent investimesh të huaja në Beograd, për Reuters për vizitën e parë të Erdogan në Serbi që nga viti 2010 kur ai ishte kryeministër.
“Kjo vizitë ka për qëllim të ndërtojë lidhjet politike mes dy vendeve. Nëse ky bashkëpunim politik do të rezultojë në investime varet në një masë të madhe nga Serbia dhe çfarë mund t’u ofrojë kompanive turke.
Nënshkruhet marrëveshja e tregtisë së lirë
Rreth 70 kompani turke bëjnë biznes në Serbi dhe shkëmbimet tregtare pritet të arrijnë në 1 miliard dollarë këtë vit. Erdogan tha se ata duhet të synojnë 5 miliardë dollarë dhe nënshkruan marrëveshje me Vuçiqin për të zgjeruar një marrëveshje të tregtisë së lirë për të përfshirë vajin e lulediellit dhe viçin.
