Ministri i Punëve të Jashtme i Gjermanisë, Heiko Maas, ka deklaruar sot se mes Kosovës dhe Serbisë nuk ka asnjë alternativë tjetër përveç dialogut dhe marrëveshjes gjithëpërfshirëse.
Mass ka kritikuar Bashkimin Evropian se zgjidhja e problemit mes dy vendeve, Kosovës dhe Serbisë, është vonuar, mirëpo ai ka përgëzuar emisarin e BE-së, Miroslav Lajçak, për rinisjen e negociatave mes dy vendeve në Bruksel
”Zgjidhja është e vonuar. Ndaj jam shumë mirënjohës që Miroslav Lajçak rinisi në korrik dialogun e ndërmjetësuar nga BE. Dhe unë ndaj plotësisht këndvështrimin e tij, se nuk ka asnjë alternativë tjetër veç një marrëveshjeje gjithëpërfshirëse, të qëndrueshme dhe detyruese”, ka thënë Maas.
Tutje, kryediplomati gjerman ka deklaruar se një marrëveshje finale mes dy vendeve arrihet kur ka vetëm një udhëheqje e fortë politike.
”Një hap i tillë kërkon udhëheqje të fortë politike. Dhe unë kam besim se udhëheqësit në Beograd dhe Prishtinë do ta dëshmojnë këtë – duke u angazhuar në mënyrë konstruktive kundrejt njëri-tjetrit, dhe duke shtruar kësisoj rrugën drejt një epoke të re”, ka shtuar Maas.
Të gjitha këto Maas i tha në një diskutim virtual ku pjesë e kësaj ishte edhe situata në Ballkanin Perëndimor.//gazetametro.net
