Ushtruesja e detyrës së Presidentit të Kosovës, Vjosa Osmani, ia ka ndërprerë mandatin në Komisionin Qendror të Zgjedhjeve përfaqësuesit të Listës Serbe, Nenad Rikalo.
Sipas komunikatës së ZPRK-së, vendimi është marrë pasi që Rikalo, ditë më parë, nga Qeveria e Serbisë ka marrë pozitë të lartë në të ashtuquajturën “Zyrë për Kosovën”.
“Në mbështetje të nenit 90 të Kushtetutës së Republikës së Kosovës, nenit 6 të Ligjit Nr. 03/L – 094 për Presidentin e Republikës së Kosovës (GZ, Nr. 47, 25 janar 2009), nenit 61 (paragrafi 5, pikat a dhe d) të Ligjit Nr. 03/L-073 për Zgjedhjet e Përgjithshme në Republikën e Kosovës (GZ, Nr. 31, 15 qershor 2008), nenit 3 (paragrafi 4) të Rregullores (P) Nr. 02/2016 për strukturën organizative të Presidencës (08.09.2016), si dhe duke marrë parasysh shkresën e Komisionit Qendror të Zgjedhjeve, të pranuar në Zyrën e Presidentit më 20.11.2020 (Nr. Prot.: 1240)” nxjerr: Vendim: 1. Z. Nenad Rikalo, i ndërpritet mandati si Anëtar i Komisionit Qendror të Zgjedhjeve të Republikës së Kosovës. 2. Vendimi hyn në fuqi në datën e nënshkrimit“, thuhet në vendim.
