Ministri i Shëndetësisë i Kosovës, Armend Zemaj, gjatë ditës së sotme është takuar me kryetarin e Kaçanikut, Besim Ilazi, me të cilin kanë pritur familjarët e Fidan Gashit dhe Enver Xhoklit, të lënduar në shpërthimin që ndodhi në Ferizaj. Gjatë ditës së nesërme ata do të dërgohen për shërim në Austri, ka shkruar ministri në Facebook.
Postimi i ministrit Zemaj:
Gjatë ditës, bashkë me kryetarin e Kaçanikut, z. Besim Ilazi, kam pritur familjarët e Fidan Gashit dhe Enver Xhoklit , dy të lënduarve në aksidentin në Ferizaj, të cilët gjatë ditës së nesërme do të dërgohen për trajtim mjekësor të mëtejmë në Grac të Austrisë.
Sipas profesionistëve tonë shëndetësor, gjendja e tyre shëndetësore është stabile dhe përkujdesja mjekësore nuk do t’u mungojë si atyre, ashtu edhe pacientëve të tjerë nga aksidenti i Ferizajt, të cilët po trajtohen në QKUK dhe në Spitalin e Ferizajt.
Dua ti siguroj familjarët e Fidanit dhe të Enverit, por edhe të të lënduarve të tjerë, se Republika e Kosovës, Ministria e Shëndetësisë me tërë potencialin e vet, si deri më tani, do të angazhohet për trajtimin sa më korrekt dhe gjithëpërfshirës të tyre.
Shëndeti i qytetarëve tanë është në duar të shtetit dhe asnjëherë nuk do të lihet në mëshirën e fatit apo të individëve, të cilët në mënyrë jo etike tentojnë të përfitojnë në fatkeqësinë e të tjerëve!
