Edhe pse e filluan ditën si zakonisht, një kontroll rutinor i kafshëve të egra, ekipi i helikopterit të Utah për Departamentin e Sigurisë Publike mbetën të shokuar nga ajo se çka panë në mes të shkretëtirës. Ata thanë se kjo ngjarje jo vetëm që është e jashtëzakonshme, por edhe ka të ngjarë të jetë edhe jashtëtokësore. Këta oficerë po fluturonin me helikopter të mërkurën e kaluar, duke ndihmuar Departamentin e Rezervatit të Kafshëve të Egra të numëronte delet brimëdhaja në Utahun juglindor, kur panë diçka që dukej sikur ishte marrë direkt nga filmi “2001: Një Odise Hapësinore”.
“Njëri nga biologët e pa atë objekt, dhe ishte rastësi që të fluturonim pikërisht mbi të” i tha piloti Bret Hutchings CNN-it. “Ai reagoi me shumë habi dhe thërriti ‘Kthehu, kthehu!’, ndërsa unë e pyeta se çfarë kishte. Ai më tha ‘është një objekt gjigant aty poshtë, duhet ta shikojmë!”
Ajo çka panë i la pa frymë – në mes të një shkëmbi të kuq, një monolit (lapidar) gjigant shkëlqyes nga metali i argjendtë dukej sikur kishte mbirë nga toka. Hutchings mendon se monoliti ishte “i lartë diku rreth 3 deri në 3 metra e gjysmë”. Çka e bënte edhe më të çuditshëm këtë monolit ishte se nuk dukej sikur kishte rënë rastësisht në tokë, përkundrazi dukej sikur ishte mbjellë qëllimisht.
Piloti Hutchings mendon se ka shumë të ngjarë që monoliti është vendosur nga ndonjë artist që është adhurues i filmit ” 2001: A Space Odyssey “, ku në një skenë papritmas shfaqet një monolit i zi.
Mirëpo të vendosësh një monolit të tillë që peshon disa ton jo vetëm se është e vështirë, por në shtetin e Utah është edhe e jashtëligjshme. Një deklaratë e Departamentit të Policisë së Utah-ut, tha se vendosja e strukturave ose artit pa autorizim në toka publike “është e paligjshme pa marrë parasysh se nga cili planet je”. Lokacioni i monolitit po mbahet i fshehur dhe ende nuk është e qartë se kush apo çfarë dhe për qfarë qëllimi është vendosur monoliti atje. Të hënën Byroja e Menaxhimit të Tokës do të marr vendim nëse nevojiten hetime të mëtejshme rreth prejardhjes dhe përbërjes së këtij monoliti. CNN
