Ushtruesja e detyrës së presidentes së Kosovës dhe kryetarja e Kuvendit, Vjosa Osmani, e ka nisur të mërkurën vizitën treditore në Shqipëri. Pritja me ceremoni shtetërore i është bërë Osmanit në Pallatin e Brigadave nga homologu i saj, Ilir Meta.
Osmani i ka dhuruar Metës një dekoratë me lulet që simbolizojnë dhunën seksuale.
Ndërsa të enjten më 17 dhjetor, Osmani do të takohet me homologun e saj, kryekuvendarin Gramoz Ruçi dhe do të vendosë kurora lulesh te Varrezat e Dëshmorëve të Kombit. Po ashtu, presidentja në detyrë do të mbajë fjalim në Kuvend.
Presidentja në detyrë e Kosovës Vjosa Osmani vizitoi këtë të mërkurë edhe qytetin e Lezhës.
Fillimisht ajo u ndal në Bashkinë e qytetit, ku zhvilloi një bisedë disa minutëshe me kryebashkiakun Pjerin Ndreu në zyrën e këtij të fundit.
Më pas presidentja Osmani sëbashku me delegacionin që e shoqëronte vizituan memorialin e Gjergj Kastriotit.
Ajo bëri homazhe në varrin ku prehen eshtrat e heroit tonë kombëtar dhe u njoh me historinë e këtij monumenti.
Presidentja e Kosovës Vjosa Osmani qëndroi për rreth 30 minuta në qytetin e Lezhës.
Ushtruesja e detyrës së Presidentes së Kosovës, në konferencën e përbashkët për mediat me kreun e shtetit Meta, tha se Shqipëria dhe Kosova janë të fokusuara në rrugën europiane.
“Vlerësuam të gjitha mundësitë qe e bëjnë edhe me konkrete bashkëpunim midis dy vendeve tona, në mënyrë që te jemi një shembull edhe për sa i takon standardeve të demokracisë, por njëkohësisht edhe për sa i takon përparimit të integrimit evropian në rajonin tonë”, tha ai.
Meta po ashtu bëri thirrje që dy vendet të shtojnë bashkëpunimet në të gjitha fushat, duke krijuar mundësi të reja për shkëmbim eksperiencash mes shkencës, kulturës dhe biznesit.
“Marrëdhëniet shumë të mira ndërshtetërore kanë nevojë të gjenerojnë mundësi praktike, në mënyrë që kufiri ndërshtetëror të behët jo vetëm i padukshëm, por edhe qytetarë tanë, artistët, bizneset, sportistë, intelektualët, njerëzit e shkencës, të rinjtë tani edhe më shumë ta afrohen dhe të shkëmbejnë eksperienca me njëri tjetrin, dije, përvojë eksperienca, dije, kulturë, dhe unë besoj se kjo do të ndodhë më mirë në të ardhmen”, tha Meta.
Presidenti i Shqipërisë u shpreh edhe njëherë i vendosur për të ruajtur integritetin dhe pavarësinë e shtetit të Kosovës.
“E sigurova presidenten Osmani, se ne do të mbështesim me të gjitha energjitë tonë pavarësinë, sovranitetin dhe integritetin e Republikës së Kosovës, sepse jemi të bindur në legjitimitetin e saj ndërkombëtar’, tha Meta.
Presidentja në detyrë e Kosovës, Vjosa Osmani, teksa vlerësoi rolin e Metës në kundërshtimin e ideve për shkëmbimin e territoreve me Serbinë, bëri një kërkesë publike, ndërsa kërkoi që Kuvendi i Shqipërisë të miratojë një rezolutë, në të cilën të kërkohet dënimi i krimeve dhe gjenocidit serb mbi shqiptarët e Kosovës.
“Janë disa çështje për të cilat i diskutuam me presidentin dhe të cilat do t’i diskutoj edhe nesër në takime që vijojnë, e para ka të bëjë me kërkesën tonë që Kuvendi i Shqipërisë të miratojë deklaratën ose rezolutën, që do të dënonte gjenocidin serb në Kosovë. Kuvendi ynë tashmë e ka miratuar këtë deklaratë ku fiitet për krimet dhe dënimin e tyre. Është krejt e natyrshme, që presim, që vendi i dytë ta bëjë këtë pas Kosovës të jetë Shqipëria”, tha Osmani.
