Përktheu dhe përgatiti Valmir Mehmetaj
Mesa duket presidenca përmes Twitterit ka mbaruar në Amerikë. Donald Trump është pezulluar nga Twitter dhe Facebook pasi ka postuar në Twitter për mbështetësit e tij që sulmuan Kapitolin e SHBA-ve.
Në një mesazh në rrjetin social për protestuesit iu tha “Ju dua” para se t’u thoshte të shkonin në shtëpi. Ai gjithashtu përsëriti pretendimet e tija për mashtrime zgjedhore.
Twitter tha se kërkohej heqja e tre postimeve për “shkelje të rënda të politikës sonë të Integritetit Qytetar”.
Kompania tha se profili i presidentit do të mbetej i mbyllur përgjithmonë nëse këto postime nuk hiqeshin.
Ata vazhduan duke thënë se “Shkeljet e ardhshme të Rregullave të Twitter-it … do të rezultojnë në pezullimin e përhershëm të llogarisë @realDonaldTrump”.
Kjo do të thotë se Donald Trump i ka ditët e numëruara në Twitter, pasiqë ai nuk i kushton shumë vëmendje udhëzimeve të Twitter-it.
Ndërkohë, edhe Facebook bllokoi z.Trump për 24 orë. YouTube gjithashtu hoqi videon e Trampit ku iu drejtohej protestuesve.
Facebook arsyetoi bllokimin duke thënë se: “Ne e hoqëm atë sepse besojmë që më shumë i kontribuon rrezikut për dhunë të vazhdueshme sesa që e zvogëlon atë.”
Përkrahësit e tij sulmuan selinë e qeverisë amerikane dhe u përplasën me policinë, duke çuar në vdekjen e katër vetëve.
Para dhunës, Presidenti Trump u kishte thënë mbështetësve në National Mall në Uashington se zgjedhjet ishin vjedhur.
Disa orë më vonë, ndërsa dhuna u montua brenda dhe jashtë Kapitolit të SHBA, ai u shfaq në video dhe përsëriti këtë pretendim të pabazë.
Ai u tha protestuesve se “Ju dua” dhe përshkroi njerëzit që sulmuan kompleksin e Kapitolit si “patriotë”.
YouTube tha se e hoqi videon sepse “shkelte politikat që ndalojnë përhapjen e mashtrimit zgjedhor”.
Twitter fillimisht nuk e hoqi videon, por hoqi mundësinë që kjo video të rishikohet, pëlqehet dhe komentohet, së bashku me një postim tjetër.
Sidoqoftë, më vonë edhe ata larguan këtë video dhe pezulluan llogarinë e presidentit në largim.
Facebook gjithashtu tha se aktualisht po kërkon dhe po heq përmbajtje që nxisin ose mbështesin sulmet në Kapitol Hill.
Marshimi u organizua pjesërisht në internet, duke përfshirë në grupe dhe faqe në Facebook.
Ka të ngjarë që Presidenti i zgjedhur Joe Biden do të kërkojë që të goditen teoritë e konspiracionit dhe ekstremizmi në mediat sociale pasi që ta marrë detyrën. BBC
