Të paktën 32 veta humbën jetën dhe 85 të tjerë mbetën të plagosur në një përplasje mes një treni udhëtarësh dhe një treni mallrash në Greqinë veriore.
Trenat u përplasën pranë qytetit Tempe, rreth 380 kilometra në veri të Athinës, kryeqytetit grek. Treni i udhëtarëve ishte nisur nga veriu i Athinës për në qytetin e Selanikut, ndërsa treni i mallrave po udhëtonte në jug nga Selaniku për në qytetin e Larisës. Të paktën tre vagonë udhëtarësh dolën nga binarët dhe u përfshinë nga flakët.
Autoritetet thonë se rreth 250 udhëtarë që i mbijetuan aksidentit të padëmtuar ose me lëndime të lehta, u transportuan me autobus për në Selanik. Në trenin e udhëtarëve ishin 350 veta.
Të paktën 150 zjarrfikës me 17 automjete dhe 40 ambulanca janë në vendin e katastrofës në kërkim të më shumë udhëtarëve që mund të jenë ende të bllokuar në rrënojat e trenit. Të paktën 25 persona me plagë të rënda u transportuan në spitalet e afërta.
Zëdhënësi i Shërbimit të Zjarrfikësve, Vassilis Varthakogiannis, i tha televizionit shtetëror se përpjekjet për shpëtim po zhvillohen “në kushte shumë të vështira duke pasur parasysh përplasjen e rëndë të trenave”.
