Një person hapi zjarr me snajper ndaj zyrës së Agjencisë Amerikane të Zbatimit të Imigracionit (ICE) në Dallas duke lënë pas dy të vdekur dhe një të plagosur rëndë.
Policia e identifikoi autorin si Joshua Jahn, një 29-vjeçar, i cili hapi zjarr nga një çati aty pranë duke u marrë jetën 2 të burgosurve dhe duke plagosur një tjetër. Më pas ai ktheu armën nga vetja dhe u vetëvra.
Vëllai i tij, Noah, i tha NBC-së se Joshua “nuk kishte ndjenja negative për ICE mesa di unë. Nuk mendoja se ai ishte i interesuar në politikë. Për aq sa di unë, ai nuk ishte i interesuar për politikën e asnjërës palë”, përfundoi ai.
“Hetimi paraprak ka përcaktuar se i dyshuari hapi zjarr në një strukturë qeveritare nga një ndërtesë ngjitur. Dy persona u transportuan në spital me plagë nga arma e zjarrit. I dyshuari ka ndërruar jetë” – tha policia e Dallasit.
Sulmi në Dallas “kundër ICE ishte i ngjashëm me atë që ndodhi në Teksas më 4 korrik” shpjegoi agjenti special i FBI-së, Joe Rothrock, në një konferencë për shtyp. Ai tregoi se në plumbat e përdorur nga autori u gjetën të shkruara mesazhe anti-ICE.
FBI konfirmoi se nuk kishte viktima nga radhët e policisë.
“Për muaj të tërë, ne i kemi paralajmëruar politikanët dhe median që të ulin retorikën e tyre ndaj ICE-së përpara se dikush të vritet”, – shkroi në X Sekretarja e Sigurisë Kombëtare, Kristi Noem.
“Le të shërbejnë këto vdekje të tmerrshme si një mësim për të majtën ekstreme” – për atë që mund të bëjë retorika e tyre për ICE” – shtoi ajo. Qendrat e ICE përdoren zakonisht për të përpunuar emigrantët para se të transferohen në qendrën e paraburgimit.
Politika e administratës Trump kundër emigrantëve duke i mbledhur ata në qendra dhe më pas duke i dëbuar ka shkaktuar debate të forta në SHBA.
