Një gjykatë boshnjake e klasifikon marshimin si jokushtetues – por mijëra veta i prijnë marshimit të armatosur. Djali në hije i presidentit serb Vuçiq, promovoi paraqitjen e tij të parë zyrtare.
Udhëheqja e pjesës serbe të Bosnjës paraqiti forcën me një paradë paraushtarake në periferi të Sarajevës. 2000 paraushtarakë, oficerë policie dhe nëpunës civilë të Republikës Serbe (RS) marshuan në Sarajevën Lindore përpara Presidentit të RS Milorad Dodik dhe mysafirëve të tij.
Parada ishte pjesë e festimeve të të ashtuquajturës Dita e Republikës Serbe. Disa mijëra serbë u rreshtuan në rrugë dhe valëvitën flamujt e RS dhe Serbisë fqinje. Gjykata Kushtetuese e Bosnjës e shpalli si jokushtetues marshimin vjetor më 9 janar. Këtë vit ajo u mbajt për herë të parë në Sarajevën Lindore, një zonë e vogël në skajin lindor të kryeqytetit boshnjak që i përket RS.
Më 9 janar 1992, krimineli i dënuar i luftës Radovan Karaxhiç themeloi Republikën Serbe të Bosnjës me mbështetjen e pjesës tjetër të Jugosllavisë (Serbisë dhe Malit të Zi). Në luftën që pasoi (1992-1995), ushtria jugosllave dhe serbe e Bosnjës kryen gjenocid dhe masakra duke dëbuar popullsinë boshnjake dhe kroate.
Miku i Putinit, Dodik, promovon shkëputjen nga Bosnja
Për disa vite, Dodik ka promovuar ndarjen e RS nga Bosnja, e cila përbëhet nga Republika Serbe dhe Federata Boshnjake-Kroate (FBiH). Për popullatën shumicë boshnjake në Sarajevë, marshimi përfaqësonte një provokim.Gjatë Luftës së Bosnjës, qyteti ishte i rrethuar nga malet përreth dhe nga Sarajeva e sotme Lindore për më shumë se tre vjet. Parada u zhvillua më pak se 500 metra nga kufiri midis dy pjesëve të vendit.
Në fjalimin e tij, Dodik e stilizoi RS si një “republikë paqeje dhe lirie”. Ministri i Jashtëm serb Ivica Daçiq u ul pranë Dodikut në tribunë. Presidenti serb Aleksandar Vuçiq dërgoi djalin e tij Danilo në festën në Sarajevën lindore. Ishte paraqitja e parë zyrtare e pasardhësve presidencialë serbë. Danilo Vuçiq deri më tani ka tërhequr vëmendjen para së gjithash përmes fotove në media që e paraqesin në shoqërinë e figurave të botës së krimit.
Një ditë më parë, në kryeqytetin e RS, Banja Luka, Dodik i kishte dorëzuar Urdhrin e RS Presidentit rus Vladimir Putin në mungesë. Dodik tha se do tia dorëzonte personalisht Putinit më vonë.
Dodik është pritur vazhdimisht nga Putin, gjë që nuk ka ndryshuar që nga fillimi i luftës së agresionit të Rusisë kundër Ukrainës. Ambasada e SHBA në Sarajevë dënoi marshimin dhe politikën e shkëputjes së Dodik. “Republika e Serbisë do të shkatërrojë vetëm veten dhe ata përreth saj, duke ndjekur vullnetin e pavarësisë,” thuhet në llogarinë e ambasadës në Twitter .
Burimi: ntv.de, rog/dpa, Nga Gjermanishtja Sherif Ramabaja
