Ndërkaq kur është pyetur se çfarë janë raportet e tij me të ngarkuarin e ish-presidentit të SHBA-së, Donald Trump, për dialogun Kosovë-Serbi, Richard Grenell, ai është përgjigjur se me të komunikon rregullisht.
“Komunikimin e kemi të rregullt dhe e kemi pasur edhe në të kaluarën me të dyja kampet politike të SHBA-së, me republikanët dhe me demokratët. Mirë që është konfirmuar, pavarësisht ndërrimit të administratës atje Marrëveshja e nënshkruar në Uashington më 4 shtator do vazhdojë të zbatohet dhe jemi duke punuar çdo ditë. Javën që shkoi kemi pasur një takim me DFC-në për të identifikuar çështjet që duhet t’i çojmë përpara si dy qeveri, për zotimet që kemi marrë për realizimin e këtyre”, është shprehur kryeministri Hoti.
