Gjykata më e lartë e Kombeve të Bashkuara i ka urdhëruar Armeninë dhe Azerbajxhanin që të punojnë për t’i parandaluar urrejtjen racore dhe diskriminimin dhe për ta zbutur armiqësinë mes vete pas luftës së vitit të kaluar për Nagorno-Karabakun.
Gjykata Ndërkombëtare e Drejtësisë gjithashtu e urdhëroi Azerbajxhanin për t’i mbrojtur të burgosurit armenë nga konflikti dhe ta ndalojë përdhosjen e trashëgimisë kulturore armene, shkruan Free Europe, përcjell Gazeta Express.
Urdhrat e gjykatës me seli në Hagë janë në pritje të një rishikimi të plotë të rastit rreth mosmarrëveshjes, proces që mund të marrë disa vjet për t’u zgjidhur. Megjithatë, gjykatësit nuk kanë mjete konkrete për t’i zbatuar urdhrat e tyre.
Armenia dhe Azerbajxhani kanë kërkuar nga kjo gjykatë që të marrë masa urgjente ndaj njëra-tjetrës për pretendimet rreth shkeljeve të një traktati të Kombeve të Bashkuara kundër diskriminimit racor.
Gjykata e urdhëroi Azerbajxhanin për t’i mbrojtur të gjithë të burgosurit armenë nga konflikti nga dhuna dhe lëndimi trupor dhe të sigurohet që ata të trajtohen sipas ligjit si dhe t’i parandalojë vandalizimin e përdhosjen e kishave e trashëgimisë tjetër kulturore armene.
Gjykata Ndërkombëtare e Drejtësisë e refuzoi kërkesën e Azerbajxhanit për ta urdhëruar Armeninë që ta ndërpresë vendosjen e minave tokësore dhe t’i dorëzojë hartat e zonave të minuara, duke thënë se një gjë e tillë nuk mbulohet nga Konventa Ndërkombëtare për të Gjitha Format e Diskriminimit Racor.
Gjatë seancave që u mbajtën në tetor, Armenia e akuzoi Azerbajxhanin për nxitje të një “cikli të urrejtjes”, ndërsa Azerbajxhani e akuzoi Armeninë për “pastrim etnik”.
Urdhri i gjykatës erdhi vetëm disa ditë pasi Azerbajxhani njoftoi më 4 dhjetor se ka liruar 10 ushtarë armenë, të kapur gjatë përleshjeve vdekjeprurëse në zonën kufitare në nëntor. Në anën tjetër, Armenia dorëzoi harta me hollësi për vendndodhjen e fushave të minuara.
