Censura e Erdoganit për gjenocidin në Kinë

Transmetimet e pezulluara në TV Turk gjatë dëshmisë së drejtpërdrejt të një gruaje Ujgure.Kreu i Partisë İYİ, Meral Akşener, ia la mikrofonin Nursiman Abduraşid, ujgure, e thirrur për të dëshmuar për vuajtjet dhe persekutimet kineze ndaj ujgurëve në Rajonin Autonom të Xinjiang. Kur gruaja filloi të fliste, agjencia e lajmeve qeveritare Anadolu dhe TV i Parlamentit Turk pezulluan transmetimet, për t’i rifilluar ato në fund të fjalës së saj. Sikleti i qeverisë turke për çështjen e persekutimit të ujgurëve, tani i quajtur “gjenocid” nga Amerika, nuk është i ri. Marrëdhëniet ekonomike midis Turqisë së Rexhep Tajip Erdogan dhe Kinës së Xi Jinping po bëhen gjithnjë e më të afërta, dhe kjo gjithashtu ndikon në çështjet kritike politike për Pekinin. Gjithashtu për këtë arsye ka gjithnjë e më pak ujgurë që po përpiqen të strehohen në Turqi, teorikisht në vendin e tyre më të afërt, gjeografikisht dhe kulturalisht. Ata nuk besojnë më se Turqia është vend i sigurt, duke pasur parasysh heshtjen e Erdoganit për këtë çështje (gjenocidin kinez ndaj ujgurëve e heshtin edhe shumica e vendeve myslimane). Me pandeminë, kjo heshtje është bërë shurdhuese: disa javë më parë, Turqia filloi vaksinimin masiv të popullatës me vaksinën kineze. Dozat erdhën pas shumë vonesave, të cilat sipas mediave turke ndoshta ishin për shkak të një lloj shantazhi nga autoritetet e Pekinit: Kina dëshiron që Parlamenti Turk të ratifikojë traktatin e ekstradimit të nënshkruar me Ankara në 2017 sa më shpejt të jetë e mundur. Por për bashkësinë ndërkombëtare dhe gjithashtu për një pjesë të madhe të opinionit publik turk kjo do të nënkuptonte vendosjen e ujgurëve në Turqi në duart e kinezëve dhe, në fakt, të qenit bashkëpunëtorë në gjenocid. Il Foglio.