Sherif Ramabaja
Këto ditë presidenti Trump, sapo e lëshoi një fjalë të madhe mbi Kosovën dhe Serbin dhe në Kosovë u ngritën temperaturat. Fantazia njerëzore u ngjall dhe mori qiellin. Presidenti Trump, nuk e paska harruar Kosovën. SHBA do t´i kthehen sërish Ballkanit dhe Kosovës. Marrëveshja do t´i imponohet Serbisë. Presidenti Trump nuk do ia plotësoi kërkesat Serbisë, ashtu siç kanë menduar serbët. Kosova me presidentin Tump, do t´ia arrij qëllimit përfundimtar etj. etj.
Megjithatë, ajo që mund t´i preokupoi shqiptarët nuk u tha. Për presidentin Trump, me rëndësi do të ishte të arrihet marrëveshja, por si do të dukej ajo, për te nuk qon shumë peshë. Kryesorja do të ishte se ai, arriti ta „Ndaloi” luftën dhe të kemi marrëveshje. Kjo do të hynte në llogarinë e tij, si një sukses personal që t’ia ngritë namin, pas dështimeve të njëpasnjëshme në politikën e brendshme, po ashtu edhe në arenën ndërkombëtare, do të thoshin shumë personalitete.
Pyetja më delikate që mund të bëhej, do të ishte: me cilin lider nga Kosova do ta arrinte presidenti Trump, marrëveshjen? Avdullah Hotit i mungon Thaçi. Me Albin Kurtin, të arrihet një marrëveshje të cilën e pretendon presidenti Trump, apo bashkësia ndërkombëtare, do të ishte, të thuash, e pamundur.
Cili pra do të ishte ai lider, që do ta merrte një përgjegjësi të tillë mbi marrëveshjen, mbetet të shihet. Gara është hapur. Liderët e partive siç janë Abdixhiku, Haradinaj, Memli Krasniqi, Limaj etj. e kanë hapur garën në parlament, për t´i prirë valles.
Si prijës i kësaj valleje që moti është duke konkurruar Haradinaj, duke e akuzuar Kurtin edhe si tradhtar, kurse këto ditë edhe Abdixhiku e tregoi pozicionin e tij politik. Do ta respektojmë vendimin e gjykatës Kushtetuese, çfarëdo qoftë ai, po nëse mënyra e votimit do të aprovohet e fshehtë, deputetët tanë para kamerës do ta shpalosin votën e tyre, deklaroi lideri i LDK.
Shtrohet pyetja, a është ky presion ndaj deputetëve, se si do ta hedhin votën e tyre. Në perëndim ky qëndrim quhet, cenim i sferës private. Ndryshe mund të emërohet edhe si urdhër stalinist: po votove ndryshe nga qëndrimi im, dije se ç’të pret.
Përpos këtij qëndrimi, ta quajmë diktatorial, Abdixhiku këto ditë deklaroi : Kurti politikisht është i paditur. Se si do ta mat populli diturinë e Kurtit dhe Abdixhikut, mbetet të shihet me hapjen e kutive të votimit. Një duhet të jetë e sigurtë: dikush po mundohet të fluturojë pa krahë.
Kosova ka edhe liderët tjerë: Memli Krasniqin, Fatmir Limajn etj. po kemi edhe liderët nën hije siç janë: Baton Haxhiu, Buzhala, Lirim Mehmetaj, Molliqaj etj. etj. të cilët janë të gatshëm, në rast të ndonjë të papriture, të emërohen drejtpërdrejtë, në pozitat e udhëheqjes shtetërore.
Memli Krasniqi do t´i përmbahet linjës së Thaçit për ndarje, apo për ndërrime territoriale, kurse një kurs të tillë mendohet se do ta përkrahte edhe Haradinaj, kur dihet se si veproi me Çakorrin. Limaj për momentin mbetet enigmë, sepse nuk dihet qëndrimi i tij përfundimtar, po vështirë t´i besohej, kur edhe ky njihet se është i uritur për pushtet.
Liderët nën hije Baton Haxhiu, Molliqaj, Buzhala, Lirim Mehmetaj etj. do t´u hynin kompromiseve me Serbinë pa dhimbje. Marrëveshja e ofruar prej tyre, do t´i kënaqte apetitet e Serbisë dhe do t´i arsyetonte qëndrimet e bashkësisë ndërkombëtare, për kompromisin e dyanshëm.
Më në fund qytetarëve të Kosovës u mbetet barra kryesore, se si do t´i vlerësojnë liderët e tyre aktual. Sa u besojnë atyre dhe ç´presin prej tyre. Vlerësimi duhet të matet jo vetëm me të kaluarën e tyre, po edhe me veprimet e tyre të tashme politike, në të mirën e atdheut.
