Kryeministri i Kosovës, Albin Kurti priti ne takim Pastorin e Kishës Ungjillore të Kosovës “Bashkësia e Popullit të Zotit”, Artur Krasniqi, bashkë me përfaqësues të tjerë nga Kisha Ungjillore. Në një takim të ngrohtë, pastori Krasniqi e informoi kryeministrin Kurti për pozitën e Kishës Ungjillore të Kosovës për zbrastësinë ligjore dhe vështirësitë e veprimtarisë.
Bashkërisht diskutuan mbi Projektligjin për liritë fetare, i cili u vlerësua pozitivisht nga përfaqësuesit e Kishës Ungjillore, teksa shprehën edhe keqardhjen që ky projektligj nuk po votohet në Kuvend. Kjo ndodhë për shkak që projektligji në fjalë duhet votuar edhe nga 2/3 e përfaqësuesve të komuniteteve, si ligj i interesit vital.
Votimi i tij nënkupton rregullimin e statusit të bashkësive fetare në vend, që çon drejt gëzimit të plotë të lirisë fetare, e cila garantohet me Kushtetutë e Konventën Evropiane për të Drejtat e Njeriut, si pjesë e saj. Zyra e Kryeministrit ka shtyrë përpara këtë projekligj të rëndësishëm, me qëllim mbrojtjen e të gjitha bashkësive fetare që jetojnë e veprojnë në Kosovë.
