Jaswant Singh Chail u dënua me 9 vite burg për tradhti pasi u paraqit në rezidencën mbretërore angleze për të vrarë me një hark mbretëreshën Elizabeth. Sipas vendimit të gjyqtarit, për ngjarjen e vitit 2021, Chail do të shtrohet fillimisht në një institucion psikiatrik sipas ligjit vendor të shëndetit mendor, dhe më pas do të transferohet në burg, kur mjekët të përcaktojnë se ai ka marrë trajtimin që i nevojitet.
Ditën e Krishtlindjes, 21-vjeçari u shfaq në Kështjellën Windsor me qëllimin për të vrarë mbretëreshën e ndjerë Elizabeth, e cila po qëndronte në kështjellë në atë kohë. Burri u shfaq me një maskë hekuri dhe një hark profesionist, u ngjit mbi gardh dhe endej rreth territorit të kështjellës për dy orë përpara se të arrestohej. Kjo i kushtoi atij dënimin e parë për tradhti në Mbretërinë e Bashkuar që nga viti 1981.
Duke dhënë dënimin, gjykatësi Hilliard në Gjykatën Qendrore Penale të Londrës tha se Chail kishte pasur mendime vrasëse përpara se të bëhej psikotik dhe do të kishte vepruar sipas tyre. “Qëllimi i tij nuk ishte vetëm të alarmonte dhe të trembte sovranin, por ta vriste atë”, tha gjykatësi. Gjykata kujtoi se ai ishte i armatosur me një hark të fuqishëm, i aftë për të gjuajtur bulona, të aftë për të shkaktuar vdekjen.
Në një video të postuar në Snapchat minuta para se të hynte në park, Chail tha se veprimet e tij ishin “hakmarrje” për ata që vdiqën në masakrën e Jallianwala Bagh të vitit 1919, kur trupat britanike hapën zjarr ndaj mijëra njerëzve që ishin mbledhur në Indi.
Sipas Gjykatës, megjithatë, ai ia kishte besuar planin e tij vrasës një chatboti, që e konsideronte “të dashurën” e tij, duke u ndjerë i inkurajuar për të vepruar dhe duke besuar se do t’i bashkohej asaj pasi të vriste Mbretëreshën. Burri gjithashtu do të kishte marrë frymëzim nga Star Wars, duke e përshkruar veten si një “vrasës Sith” i angazhuar për të krijuar një botë të re.
