Një tërmet i fuqishëm me magnitudë 7.4 rihter është regjistruar në orët e para të mëngjesit në Turqi, duke shkaktuar qindra viktima dhe të plagosur, si dhe dëme kolosale materiale.
Lëkundja kryesore ndodhi rreth orës 02:16, ndërkohë që epiqendra ka qenë në provincën juglindore të Gaziantep, në kufi me Sirinë.
Deri në këto momente, raportohet për mbi 500 viktima dhe mijëra të lënduar, ndërkohë që dëmet janë të pallogaritshme.
Lëkundja kryesore është pasuar nga 50 tërmete të tjera, më i madhi prej të cilëve me magnitudë 6.7 rihter.
Sipas raportimeve, lëkundjet janë ndjerë në 10 provinca juglindore të Turqisë, ndërkohë që viktima ka dhe në territorin sirian.
Autoritetet lokale turke kanë raportuar për shembjen e dhjetëra ndërtesave, në Gaziante, si dhe në qendrat e afërta të Dijarbakirit dhe Malatyas. Dyshohet se disa persona janë bllokuar nën rrënoja. Është shpallur gjendja e jashtëzakonshme dhe janë mobilizuar të gjitha shërbimet e shpëtimit.
Menjëherë për këtë ngjarje reagoi dhe presidenti Erdogan, i cili u premtoi qytetarëve se do ta kapërcejë së bashku me ta këtë fatkeqësi, duke ofruar ndihmë për këdo person që është prekur nga tërmeti.
Ambasada shqiptare në Turqi thotë se deri tani nuk ka dëmtime për shqiptarë të prekur nga tërmeti.
“Ndërkohë, bazuar në komunikimin me Ambasadën e RSH në Turqi (që prej orëve të para të mëngjesit e deri tani) nuk ka informacion për shqiptarë të lënduar ose që mund të kenë humbur jetën”, thuhet nga ministria.
Po ashtu ministrja për Evropën dhe Punët e Jashtme të Shqipërisë, Olta Xhaçka ka shprehur ngushëllimet për jetët e humbura në Turqi dhe Siri si pasojë e tërmetit shkatërrues.
Ajo theksoi se lutje e shqiptarëve janë për popullin turk e serian dhe se vendi ynë do t’i qëndrojë në krah autoriteteve turke në këtë situatë të vështirë.
Zemrat dhe lutjet tona shkojnë për viktimat e tërmetit tragjik që goditi Turqinë dhe Sirinë sot duke shkaktuar qindra viktima. Në këtë orë të vështirë, ne jemi gati të ndihmojmë Turqinë në çdo mënyrë që mundemi”, shkruan ajo.
