RTK
Edhe një tjetër protestë kundër grevës në arsim është zhvilluar këtë të marte. Këtë herë pranë Shkollës Fillore të Mesme të Ulët “Naim Frashëri” në Prishtinë e organizuar nga Këshilli i Prindërve.
Vlora Vokshi nga ky Këshill tha se mos mbajtja e mësimit po ndikon negativisht te fëmijët, duke shtuar se po neglizhohet mirëqenia e tyre.
“Kemi ardhur këtu me një qëllim të fortë të arrihet një marrëveshje ndërmjet Qeverisë dhe SBASHK-ut sepse fëmijët e kanë vendin në shkollë”.
Ajo u ka bërë thirrje të gjitha palëve që sa më shpejtë të bëjnë zgjidhje për të mirën e përgjithshme, por assesi duke cenuar të drejtën e shkollimit të fëmijëve.
“Ne ndjehemi tejet të zhgënjyer e të indinjuar për prolongimin e një epilogu ndërmjet Qeverisë dhe SBASHK-ut që ndikon negativisht të fëmijët tanë. Përmes kësaj proteste, ne prindërit duam të dërgojmë një mesazh te të gjitha palët që bashkëbisedojnë që sa më shpejtë të bëjnë një zgjidhje, sepse e drejta e fëmijëve në arsim është e garantuar me kushtetutë”, shtoi ajo.
Vokshi tha se ata si prindër nuk janë as në anën e Qeverisë e as të SBASHK-ut dhe kushdo që tenton ta shfrytëzoj si përkrahje e ndonjërës palë është tendencioze.
