Sherif Ramabaja
Evropa po digjet. Temperaturat mbi 40 gradë. Ky është vetëm fillimi. Njerëzimi para ndryshimeve dramatike klimatike. Luftërat në të ardhmen nuk do të bëhen për ari, argjend, gaz, xehe delikate, derivate të naftës etj. po për ujë.
Opozita e Kosovës i ka nuhatur këto gjëra dhe e ka vënë në shënjestër Kurtin duke e quajtur të dështuar dhe të paaftë në ballafaqimin me këto probleme, hallet e popullit dhe problemin madhor me Serbinë.
Asnjëherë pra nuk u pajtuam dhe nuk mund ta merrnim me mend që Kurti ndonjëherë t´i fitonte zgjedhjet, kur e mendonim se si e kishim çimentuar pushtetin tonë.
Kjo luftë kundër mazhorancës e sidomos kundër Kurtit, Vjosës e Donikës nuk kishte pushuar asnjëherë, po kishte marr gjithnjë intensitet të shtuar, sidomos nga PDK me kryetarin Memli, pastaj kishte vazhduar nga AAK në krye me Rambon – Ramushin, e kishte vazhduar me LDK Abdi -xhikun dhe me Fatmirin e Nismës.
Thënë shkurt kur kritikon ose nuk pajtohesh duhet të ofrosh alternativë, ide dhe program se si do të kishe vepruar vetë, në të kundërtën bëhesh vetëm iritues.
Këto ditë kur me intensitet kanë filluar pushimet duke e frekuentuar bregdetin, Evropën e kanë kapluar flakët e vapës, ku zjarret po bëjnë kërdi, duke filluar nga Portugalia deri në Shqipëri.
Derisa po luftohet me flakët e zjarrit, u dëgjua një lajm kumbues : Shqipëria dhe Maqedonia i hapën bisedimet me EU.
Në vazhdën e këtyre ngjarjeve edhe opozita e Kosovës në krye me liderët e tyre u paraqitën me ide dhe programe të reja, se si Evropa t´i vejë nën kontroll zjarret, të cilat po e rrezikojnë kontinentin tonë të përbashkët.
Opozita së pari reagoi ndaj Italisë e cila në këtë kohë sa të rrezikshme po aq të paqarta, krijoj krizë qeveritare dhe në vend që të merrej me pasojat e thatësisë që e ka kapluar vendin dhe zjarret, gjeti kohë që ta ndezë luftën për pushtet.
Ne opozita e Kosovës për momentin po e pushojmë urrejtjen ndaj Kurtit, Vjosës dhe Donikës. Për momentin i përkushtohemi zjarreve, që e kanë kapluar vendin amë Shqipërinë, Greqinë dhe mbarë Evropën etj.
Ne kërkojmë nga anëtarësia e jonë që të lajmërohen vullnetarë dhe t´iu bashkohen skuadrave të zjarrfikësve dhe shpëtimtare për t´i luftuar flakët e kontinentit.
Të jemi të qartë, skuadrat tona mos t´u bashkohen divizioneve të luftës në Ukrainë kundër Putinit, po t´i dallojnë zjarret, sepse ne e kemi fjalën vetëm për zjarret e vapës ekstreme.
Po ashtu anëtarësia e jonë nuk duhet ta ngatërroi mobilizimin për Veriun e Kosovës dhe Radojçiqin, sepse kjo është detyrë e rendit qeveritar dhe sistemit të drejtësisë.
Kur është fjala për Veriun ne po ashtu propozojmë që shteti ta tregoi fuqinë e tij, në mbrojtjen e kufirit. Nëse qeveria me Kurtin merr aksion të gjerë në shkatërrimin e strukturave paralele dhe bandave kriminale mund të na akuzojnë, se ju nuk po arrini t´i integroni serbët dhe me ngulm do na kërkonin Asociacionin, që ne nuk e kemi formuar dhe jemi kundër tij.
Po t´i luftoi dhe shpartalloi bandat kriminale me aksione të kufizuara, situata do të qetësohej gradualisht pa zhurmë të madhe, po rreziku është se miku i Ramës, Vuçiq do t´i nxis serbët për rezistencë të armatosur. Ne si opozitë kishim plane dhe serbët bashkëpunonin me ne.
Ne konstatojmë se është e padrejtë, të akuzohemi për mungesë të ideve dhe programeve. Jemi të mendimit se, askush nuk mund t´i mohoj qëndrimet tona pragmatike dhe idealiste.
Me këto qëndrime kur të përfundoi fushata e zjarreve shpresojmë të vazhdojmë me kreativitet për t´i bashkuar forcat në rrëzimin e Kurtit dhe qeverisë së tij, i cili Kosovën po e sjell buzë falimentimit.
Ai nuk po merret me hallet e popullit, por ditë e natë mendon vetëm si t´i ngris çmimet e energjisë dhe artikujve ushqimorë. Ai e zbrazi Kosovën. Kjo nuk durohet tutje.
Mars – Rover (Shkrim me përmbajtje ironike)
