Kryetari i LVV-së, kandidat për kryeministër të Kosovës, Albin Kurti, sot te pllaka përkujtimore në sheshin e kryeqytetit, bashkë me familjarët e dy dëshmorëve, anëtarë të kryesisë së Lëvizjes, kandidatë për deputetë dhe aktivistë të Lëvizjes VETËVENDOSJE!, bëri homazhe në kujtim dhe nderim të veprës së Mon Balajt dhe Arben Xheladinit. Moni dhe Arbeni u vranë më 14 shkurt 2007 derisa prottestonin në Prishtinë kundër Planit të Ahtisarit.
“Drejtësia për Monin dhe Arbenin dhe liria e vetëvendosja e popullit të Kosovës janë shumë të lidhura në këtë shekull dhe shënojnë një gurthemel të besnikërisë së organizatës së Lëvizjes tonë, e të secilit aktivistë të saj. Ne sot, edhe te varri i Monit, edhe te varri i Arbenit, te pllaka përkujtimore këtu në shesh, bëmë homazhe në nderim të tyre dhe vendosëm lule të freskëta duke mos harruar asnjëherë që brezat e shqiptarëve e bartin pishtarin e lirisë nga njëri në tjetrin dhe në këtë mënyrë mundësojnë ecjen përpara të popullit të Kosovës nga i cili vijmë dhe tek i cili gjithmonë rikthehemi. Lavdi Monit dhe Arbenit dhe gjithë martirëve e dëshmorëve të kombit”, tha Kurti.
